ⵕⵕⴱⴰⴹ -
ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵛⴰⵡⴰⵕⵏ ⵢⴰⵏ ⵓⵎⵙⴰⴳⴰⵔ ⵅⴼ « ⴰⵙⵍⴳⵏ ⵏ ⵓⵙⵏⵎⴰⵍⴰ ⵏ ⵓⵣⵓⴳⵣ ⵓⵏⵚⵉⴱ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ », ⴰⵙⵙ ⵏ ⵓⴽⵕⴰⵙ ⴳ ⵕⵕⴱⴰⴹ, ⵙ ⵜⵉⵍⵉⵜ ⵏ ⵛⴰⵢⴳⴰⵏ ⵏ ⵉⵙⵎⴷⵢⴰⵜⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵓⵙⵇⵇⵉⵎ ⵡⵉⵙⵙ ⵙⵙⵉⵏ ⵏ ⵍⴱⵕⵍⴰⵎⴰⵏ ⴷ ⵡⴰⵎⵓⵏ ⵓⵖⵔⵉⵎ.
ⴷ ⵉⵜⵜⵓⵙⵏⵎⴰⵍⴰ ⵓⵎⵙⴰⴳⴰⵔ ⴰⴷ ⵙ ⵜⵙⵏⵜⴰⵢⵜ ⵏ ⵜⴼⵉⴷⵉⵕⴰⵍⵉⵢⵜ ⵜⴰⵏⴰⵎⵓⵔⵜ ⵏ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵉⵏ ⴳ ⵍⵍⴰⵏ ⵛⴰⵢⴳⴰⵏ ⵏ ⵉⵙⴰⵜⵉⵜⵏ ⵉⵙⵎⵓⵙⵙⵓⵏ ⴳ ⵢⵉⴳⵔ ⴰⴷⵍⵙⴰⵏ ⴰⵎⴰⵣⵉⵖ ⴷⵓ ⵜⵎⴰⵜⴰⵔⵜ « ⵜⴰⵎⴰⵣⵉⵖⵜ ⵜⴰⵎⵙⵜⴳⴳⵯⴰⵔⵜ ⵏ ⴽⵓ ⴰⴽⴽⵯ ⵉⵎⵖⵔⴰⴱⵉⵢⵏ ».
ⵙ ⵓⵣⵎⵣⵣⵓ ⴰⴷ ⵉⵏⵏⴰ ⵎⴰⵙⵙ ⵃⴰⴽⵉⵎ ⴱⵏ ⵛⵎⵎⴰⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⴰⵡⴰⵕⵏ ⵎⴰⵙ ⴷ ⴰⵙⵏⵎⴰⵍⴰ ⵏ ⵓⵎⵙⴰⴳⴰⵔ ⴰⴷ, ⵉⴽⵛⴰⵎ ⴳ ⵓⵙⴰⵜⵉ ⵏ ⵓⵎⵢⴰⵖ ⵏ ⵓⵙⵇⵇⵉⵎ ⴷ ⵜⵙⵏⵜⴰⵢⵉⵏ ⵏ ⵡⴰⵎⵓⵏ ⵓⵖⵔⵉⵎ ⵉⵜⵎⵣⴰⵖⵏ ⵅⴼ ⵉⵣⵔⴼⴰⵏ ⵉⴷⵍⵙⴰⵏ ⴷ ⵉⵙⵏⵉⵍⵙⵏ, ⵉⴷⴷⴰⴷ ⴳ ⵓⵎⴹⴰⴽⴰⵔ ⴰⴳⴷⵓⴷⴰⵏ ⵏ ⵓⵙⵙⵓⵊⴷ ⵏ ⵉⵙⵏⵜⵉⵜⵏ ⵏ ⵉⵙⵍⴳⵏ ⵏ ⵓⵙⵏⵎⴰⵍⴰ ⵉⴳⴰⵏ ⴰⵣⵓⴳⵣ ⵓⵏⵚⵉⴱ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ ⴷ ⵜⴷⵍⵙⴰ ⵜⴰⵎⴰⵣⵉⵖⵜ.
ⴷ ⵉⵣⵎⵎⴰⵎ ⵎⴰⵙⵙ ⴱⵏ ⵛⵎⵎⴰⵙ ⵎⴰⵙ ⴷ ⵎⵏⵏⴰⵡ ⵏ ⵉⵎⵙⴽⵔⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵉⵙⵏⵉⵍⵙⵏ ⴷ ⵉⴷⵍⵙⴰⵏ ⴳ ⵓⵙⴳⵓⵎ ⵏ ⵜⵎⴰⵣⵉⵖⵜ ⵜⵙⵎⴰⵏⵜⵏ ⵢⴰⵜ ⵜⴰⵏⵏⴰⵢⵜ ⵜⵥⵍⵉ ⵙ ⵓⵥⴰⵢ ⵏ ⵓⵖⴰⵔⴰⵙ ⵏ ⵓⵙⵢⴰⴼⵓ ⵏ ⵉⵙⵍⴳⵏ ⵏ ⵓⵙⵏⵎⴰⵍⴰ.
ⴳ ⵜⵙⴳⴰ ⵏⵏⵙ, ⵉⵖⵔⴰ ⵎⴰⵙⵙ ⵍⵃⵓⵙⴰⵢⵏ ⵎⵓⵊⴰⵀⵉⴷ ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⴼⴰ ⴷ ⵜⵜⵓⵔⴳⴳⵉⴳⵏⵜ ⵜⵢⴰⴼⵓⵜⵉⵏ ⵉⵍⴽⵎ ⵢⵉⴳⵔ ⵏ ⵜⵏⴽⵔⴰ ⵙ ⵜⵎⴰⵣⵉⵖⵜ ⵜⵓⵜⵍⴰⵢⵜ ⴷ ⵜⴷⵍⵙⴰ ⴳ ⵉⵙⵍⴳⵏ ⵏ ⵓⵙⵏⵎⴰⵍⴰ ⵉⵥⵍⵉⵏ ⵙ ⵓⵣⵓⴳⵣ ⵓⵏⵚⵉⴱ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ ⴷ ⵜⴷⵍⵙⴰ ⵜⴰⵎⴰⵣⵉⵖⵜ.
ⴳ ⵓⵎⵏⴰⴹ ⴰⴷ ⵉⵙⴷⴷⵉⴷ ⵎⴰⵙⵙ ⵎⵚⵟⴰⴼⴰ ⵊⴰⵍⵓⵇ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵉⵅⵚⵚⴰ ⴰⴷ ⵜⵉⵍⵉ ⵜⵖⴰⵔⴰ ⴳ ⵓⵙⵓⴼⵖ ⵏ ⵉⵙⵍⴳⵏ ⵏ ⵓⵙⵏⵎⴰⵍⴰ ⵉⵥⵍⵉⵏ ⵙ ⵓⵣⵓⴳⵣ ⵓⵏⵚⵉⴱ ⵉ ⵜⵎⴰⵣⵉⵖⵜ, ⴰⴼⴰ ⴷ ⵜⵥⴹⴰⵕ ⴰⴷ ⵙⴽⴰⵔ ⵜⴰⵡⵔⵉ ⵏⵏⵙ ⵣⵓⵏⴷ ⵜⵓⵜⵍⴰⵢⵜ ⵜⵓⵏⵚⵉⴱⵜ ⵜⴰⵎⴰⵏ ⵜⴰⵄⵕⴰⴱⵜ.
0 تعليقات
عبر عن رائيك في الموضوع و شاركنا اقتراحاتك عن الامازيغية لغة و ثقافة